dil mein kuchh aise gham-e-ishq ko pala jae

dil meñ kuchh aise ġham-e-ishq ko paalā jaa.e

lab se nikle to falak tak mirā naala jaa.e

kashti-e-dil ko na ab aur uchhālā jaa.e

ab ye dariyā mirī āñkhoñ se nikālā jaa.e

Taale jā sakte haiñ aksar ka.ī barham lamhāt

vaqt rahte hī agar un ko sañbhālā jaa.e

aaj bhī mujh ko yaqīñ hai vo madad kar degā

le ke us tak jo koī merā havāla jaa.e

har taġhāful ko ta'alluq meñ badalne ke liye

kabhī ehsās-e-takabbur ko hī Taalā jaa.e

din hai vo jis se añdheroñ ko jalan hotī hai

raat hai jis ke ta.āqub meñ ujālā jaa.e

kabhī ashkoñ ko bhī kuchh dard uThāne diije

dil kā har bojh tabassum pe na Daalā jaa.e

vo jo sahrā meñ haiñ be-barg 'hinā' chand shajar

kaash us samt bhī phūloñ kā risāla jaa.e

dil mein kuchh aise gham-e-ishq ko pala jae

lab se nikle to falak tak mera nala jae

kashti-e-dil ko na ab aur uchhaala jae

ab ye dariya meri aankhon se nikala jae

Tale ja sakte hain aksar kai barham lamhat

waqt rahte hi agar un ko sanbhaala jae

aaj bhi mujh ko yaqin hai wo madad kar dega

le ke us tak jo koi mera hawala jae

har taghaful ko ta'alluq mein badalne ke liye

kabhi ehsas-e-takabbur ko hi Tala jae

din hai wo jis se andheron ko jalan hoti hai

raat hai jis ke taaqub mein ujala jae

kabhi ashkon ko bhi kuchh dard uThane dije

dil ka har bojh tabassum pe na Dala jae

wo jo sahra mein hain be-barg 'hina' chand shajar

kash us samt bhi phulon ka risala jae