dil mein pahle to khaTakta na tha arman koi

dil meñ pahle to khaTaktā na thā armāñ koī

rah gayā TuuT ke shāyad tirā paikāñ koī

aa.e aa.e ruḳh-e-raushan ko chhupā.e aa.e

aa.e bikhrā.e hue zulf-e-pareshāñ koī

vo ye kahte haiñ mirī jaan rahe yā na rahe

vasl kī raat hai rah jaa.e na armāñ koī

dil rahā siine meñ jab tak rahī marne kī duā

ab ye ronā hai nahīñ ziist kā sāmāñ koī

so.e jab qabr meñ ārām se tab ham samjhe

zindagī thī ki ye thā ḳhvāb-e-pareshāñ koī

lauT jaatī hai vahīñ paañv pe aa kar bijlī

chalte chalte jo uThā letā hai dāmāñ koī

ye to maiñ kah nahīñ saktā ki vo dushman hogā

un kī mahfil se uThā ho ke pashemāñ koī

jis tarah ġham-zada 'safdar' kā janāza niklā

yuuñ bhī niklā thā kabhī ġhair kā armāñ koī

dil mein pahle to khaTakta na tha arman koi

rah gaya TuT ke shayad tera paikan koi

aae aae ruKH-e-raushan ko chhupae aae

aae bikhrae hue zulf-e-pareshan koi

wo ye kahte hain meri jaan rahe ya na rahe

wasl ki raat hai rah jae na arman koi

dil raha sine mein jab tak rahi marne ki dua

ab ye rona hai nahin zist ka saman koi

soe jab qabr mein aaram se tab hum samjhe

zindagi thi ki ye tha KHwab-e-pareshan koi

lauT jati hai wahin panw pe aa kar bijli

chalte chalte jo uTha leta hai daman koi

ye to main kah nahin sakta ki wo dushman hoga

un ki mahfil se uTha ho ke pasheman koi

jis tarah gham-zada 'safdar' ka janaza nikla

yun bhi nikla tha kabhi ghair ka arman koi