dil mein rah kar chhupa kare koi

dil meñ rah kar chhupā kare koī

aañkh ban kar hayā kare koī

ham ne maanā vafā kare koī

chāra-e-yās kyā kare koī

us kī shoḳhī pukāre kahtī hai

khul ga.e ham chhupā kare koī

tirī mahfil se fitna-gar kab tak

dard ban kar uThā kare koī

naaz hai apnī be-niyāzī par

vaqf-e-mehnat rahā kare koī

sabr-e-ayyūb se ġharaz kis ko

shukr-e-ne.amat adā kare koī

rashk-e-dushman bhī hai aziiz mujhe

terī bāteñ kiyā kare koī

donoñ aalam ko kyā karūñ le kar

qīmat-e-dil adā kare koī

tū bigāḌe to phir banā.e kaun

tū jo rūThe to kyā kare koī

jur.at-e-nāz tāb-farsā hai

kyā kahe aur kyā kare koī

sar-e-mahshar bhī ye taqāzā hai

haañ hamārā gilā kare koī

haa.e kis dil se kah diyā us ne

ġhair ban kar milā kare koī

daulat-e-husn-o-ishq baḌhtī jaa.e

aap koseñ duā kare koī

kaash vo intizār-e-marg sahī

dard ho kar davā kare koī

apne ā.īne se mukaddar ho

ḳhaak tum par miTā kare koī

dil huā zauq-e-dard se ḳhālī

ab namak-dāñ bharā kare koī

zaḳhm kambaḳht jī churāne lagā

namak-afshāñ huā kare koī

ai 'vafā' ba.ad mirzā-'ġhālib' ke

haañ ġhazal yuuñ likhā kare koī

dil mein rah kar chhupa kare koi

aankh ban kar haya kare koi

hum ne mana wafa kare koi

chaara-e-yas kya kare koi

us ki shoKHi pukare kahti hai

khul gae hum chhupa kare koi

teri mahfil se fitna-gar kab tak

dard ban kar uTha kare koi

naz hai apni be-niyazi par

waqf-e-mehnat raha kare koi

sabr-e-ayyub se gharaz kis ko

shukr-e-neamat ada kare koi

rashk-e-dushman bhi hai aziz mujhe

teri baaten kiya kare koi

donon aalam ko kya karun le kar

qimat-e-dil ada kare koi

tu bigaDe to phir banae kaun

tu jo ruThe to kya kare koi

jurat-e-naz tab-farsa hai

kya kahe aur kya kare koi

sar-e-mahshar bhi ye taqaza hai

han hamara gila kare koi

hae kis dil se kah diya us ne

ghair ban kar mila kare koi

daulat-e-husn-o-ishq baDhti jae

aap kosen dua kare koi

kash wo intizar-e-marg sahi

dard ho kar dawa kare koi

apne aaine se mukaddar ho

KHak tum par miTa kare koi

dil hua zauq-e-dard se KHali

ab namak-dan bhara kare koi

zaKHm kambaKHt ji churane laga

namak-afshan hua kare koi

ai 'wafa' baad mirza-'ghaalib' ke

han ghazal yun likha kare koi