dil mein tere ai nigar kya hai

dil meñ tire ai nigār kyā hai

hotā nahīñ ham-kanār kyā hai

aayā jo dam vo hai ġhanīmat

is ziist kā e'tibār kyā hai

haiñ seb se bhī vo chhātiyāñ saḳht

aage un ke anaar kyā hai

duniyā ke ye sab Dhakosle haiñ

turbat kaisī mazār kyā hai

tā.ūs se chheḌ-chhāḌ kaisī

haañ ai dil-e-dāġh-dār kyā hai

jo jo vo rañj deñ uThāo

jab dil hī diyā to aar kyā hai

maiñ chāhtā huuñ use na chāhūñ

dil par mirā iḳhtiyār kyā hai

mizhgāñ kā hai mere dil meñ khaTkā

ai ḳhushbū-e-nok-e-ḳhār kyā hai

miTTī mirī ḳhaak meñ milā.ī

mujh se un ko ġhubār kyā hai

dauḌūñ to mujhe sabā na paa.e

paidal kaisā savār kyā hai

bose kī talab ki vasl kā zikr

farmā.iye nāgavār kyā hai

hai kyā 'āġhā' taḌap rahā hai

kyuuñ kahte ho baar baar kyā hai

dil mein tere ai nigar kya hai

hota nahin ham-kanar kya hai

aaya jo dam wo hai ghanimat

is zist ka e'tibar kya hai

hain seb se bhi wo chhatiyan saKHt

aage un ke anar kya hai

duniya ke ye sab Dhakosle hain

turbat kaisi mazar kya hai

taus se chheD-chhaD kaisi

han ai dil-e-dagh-dar kya hai

jo jo wo ranj den uThao

jab dil hi diya to aar kya hai

main chahta hun use na chahun

dil par mera iKHtiyar kya hai

mizhgan ka hai mere dil mein khaTka

ai KHushbu-e-nok-e-KHar kya hai

miTTi meri KHak mein milai

mujh se un ko ghubar kya hai

dauDun to mujhe saba na pae

paidal kaisa sawar kya hai

bose ki talab ki wasl ka zikr

farmaiye nagawar kya hai

hai kya 'agha' taDap raha hai

kyun kahte ho bar bar kya hai