dil mein to bahut kuchh hai zaban tak nahin aata

dil meñ to bahut kuchh hai zabāñ tak nahīñ aatā

maiñ jitnā chalūñ phir bhī yahāñ tak nahīñ aatā

logoñ se Dare ho to mire saath chale aao

is rāste meñ koī makāñ tak nahīñ aatā

is zid pe tirā zulm gavārā kiyā ham ne

dekheñ ki tujhe rahm kahāñ tak nahīñ aatā

ek ek sitāra mirī āvāz pe bolā

maiñ itnī bulandī se vahāñ tak nahīñ aatā

aañsū jo baheñ surḳh to ho jaatī haiñ āñkheñ

dil aisā sulagtā hai dhuāñ tak nahīñ aatā

dil mein to bahut kuchh hai zaban tak nahin aata

main jitna chalun phir bhi yahan tak nahin aata

logon se Dare ho to mere sath chale aao

is raste mein koi makan tak nahin aata

is zid pe tera zulm gawara kiya hum ne

dekhen ki tujhe rahm kahan tak nahin aata

ek ek sitara meri aawaz pe bola

main itni bulandi se wahan tak nahin aata

aansu jo bahen surKH to ho jati hain aankhen

dil aisa sulagta hai dhuan tak nahin aata