dil mein umang aur irada koi to ho

dil meñ umañg aur irāda koī to ho

be-kaif zindagī meñ tamāshā koī to ho

ye kyā ki dafn ho ga.e chup-chāp qabr meñ

marne ke ba.ad maut kā jalsa koī to ho

koī to naam le ke pukāre hameñ yahāñ

is bhiiḌ meñ hamārā shanāsā koī to ho

miltī nahīñ hai ḳhaak kahīñ sar pe Dālne

dariyā bahut se dekhe haiñ sahrā koī to ho

āñkhoñ meñ nuur hai na halāvat zabān meñ

ahbāb itne saare haiñ mīThā koī to ho

bātoñ se aql-o-fahm kī tañg aa chukā huuñ maiñ

dānish-kade meñ ek divāna koī to ho

ye sach hai maiñ huuñ qaid ḳhayāloñ meñ ḳhvāb meñ

jiine ke vāste mire duniyā koī to ho

mar kar davām paañv ye ummīd to nahīñ

merī kahānī ba.ad meñ kahtā koī to ho

dil mein umang aur irada koi to ho

be-kaif zindagi mein tamasha koi to ho

ye kya ki dafn ho gae chup-chap qabr mein

marne ke baad maut ka jalsa koi to ho

koi to nam le ke pukare hamein yahan

is bhiD mein hamara shanasa koi to ho

milti nahin hai KHak kahin sar pe Dalne

dariya bahut se dekhe hain sahra koi to ho

aankhon mein nur hai na halawat zaban mein

ahbab itne sare hain miTha koi to ho

baaton se aql-o-fahm ki tang aa chuka hun main

danish-kade mein ek diwana koi to ho

ye sach hai main hun qaid KHayalon mein KHwab mein

jine ke waste mere duniya koi to ho

mar kar dawam panw ye ummid to nahin

meri kahani baad mein kahta koi to ho