dil mein utri hai nigah rah gain bahar palken

dil meñ utrī hai nigah rah ga.iiñ bāhar palkeñ

kyā ḳhadañg-e-nigah-e-yār kī haiñ par palkeñ

fart-e-hairat se ye be-his haiñ sarāsar palkeñ

ki huiiñ ā.ina-e-chashm kī jauhar palkeñ

ye darāzī hai ki vo shoḳh jidhar aañkh uThā.e

jā pahuñchtī haiñ nigāhoñ ke barābar palkeñ

kyā tamāshā hai ki Daale mire dil meñ sūrāḳh

aur ḳhuuñ meñ na huiiñ un kī kabhī tar palkeñ

nargis us ġhairat-e-gul-zār se kyā aañkh milā.e

aañkh bhī vo ki nahīñ jis ko mayassar palkeñ

hai ġham-e-marg-e-adū bhī but-e-kāfir kā banāv

qatra-e-ashk se haiñ rishta-e-gauhar palkeñ

chaaT detā hai tirā dil unheñ ḳhūñ-rezī kī

tez kartī haiñ isī sañg pe ḳhanjar palkeñ

lī ga.iiñ dil ko vo duzdīda nigāheñ ab yaañ

kyā dharā hai jo chaḌhā laatī haiñ lashkar palkeñ

kiina kuchh shart nahīñ un kī dil-āzārī ko

nīsh-e-aqrab haiñ tirī shoḳh sitam kar palkeñ

hai yahī girya-e-ḳhūnīñ to kisī din 'nāzim'

yuuñ hī rah jā.eñgī aapas meñ jhapak kar palkeñ

dil mein utri hai nigah rah gain bahar palken

kya KHadang-e-nigah-e-yar ki hain par palken

fart-e-hairat se ye be-his hain sarasar palken

ki huin aaina-e-chashm ki jauhar palken

ye daraazi hai ki wo shoKH jidhar aankh uThae

ja pahunchti hain nigahon ke barabar palken

kya tamasha hai ki Dale mere dil mein suraKH

aur KHun mein na huin un ki kabhi tar palken

nargis us ghairat-e-gul-zar se kya aankh milae

aankh bhi wo ki nahin jis ko mayassar palken

hai gham-e-marg-e-adu bhi but-e-kafir ka banaw

qatra-e-ashk se hain rishta-e-gauhar palken

chaT deta hai tera dil unhen KHun-rezi ki

tez karti hain isi sang pe KHanjar palken

li gain dil ko wo duzdida nigahen ab yan

kya dhara hai jo chaDha lati hain lashkar palken

kina kuchh shart nahin un ki dil-azari ko

nish-e-aqrab hain teri shoKH sitam kar palken

hai yahi girya-e-KHunin to kisi din 'nazim'

yun hi rah jaengi aapas mein jhapak kar palken