dil mera jis se bahalta koi aisa na mila

dil mirā jis se bahaltā koī aisā na milā

but ke bande mile allāh kā bandā na milā

bazm-e-yārāñ se phirī bād-e-bahārī māyūs

ek sar bhī use āmāda-e-saudā na milā

gul ke ḳhvāhāñ to nazar aa.e bahut itr-farosh

tālib-e-zamzama-e-bulbul-e-shaidā na milā

vaah kyā raah dikhā.ī hai hameñ murshid ne

kar diyā kaabe ko gum aur kalīsā na milā

rañg chehre kā to collage ne bhī rakkhā qaa.im

rañg-e-bātin meñ magar baap se beTā na milā

sayyad uTThe jo gazette le ke to lākhoñ laa.e

shaiḳh qur.ān dikhāte phire paisā na milā

hoshyāroñ meñ to ik ik se sivā haiñ 'akbar'

mujh ko dīvānoñ meñ lekin koī tujh sā na milā

dil mera jis se bahalta koi aisa na mila

but ke bande mile allah ka banda na mila

bazm-e-yaran se phiri baad-e-bahaari mayus

ek sar bhi use aamada-e-sauda na mila

gul ke KHwahan to nazar aae bahut itr-farosh

talib-e-zamzama-e-bulbul-e-shaida na mila

wah kya rah dikhai hai hamein murshid ne

kar diya kabe ko gum aur kalisa na mila

rang chehre ka to collage ne bhi rakkha qaim

rang-e-baatin mein magar bap se beTa na mila

sayyad uTThe jo gazette le ke to lakhon lae

shaiKH quran dikhate phire paisa na mila

hoshyaron mein to ek ek se siwa hain 'akbar'

mujh ko diwanon mein lekin koi tujh sa na mila