dil na baiThe use duniya ke KHazane se uTha

dil na baiThe use duniyā ke ḳhazāne se uThā

dekh ik shai bhī na is ā.ina-ḳhāne se uThā

naza.a kā karb huā kaif-e-dam-e-bāz-pasīñ

le ke siskī jo koī mere sirhāne se uThā

haa.e ab kaun sahe hañs ke mire jaur-o-sitam

shor-e-mātam mire marne kā zamāne se uThā

ishq kā dard na bardāsht kareñ dasht-o-jabal

bār-e-ġham ye bhī magar tere divāne se uThā

tai huī rāh-e-vafā jumbish-e-abrū ke nisār

zindagī bhar kā thā ik bojh jo shāne se uThā

ḳhuun se ḳhaak pe likkhī ga.ī tafsīr-e-hayāt

yā-husain aap kā naam aur miTāne se uThā

dar-e-jannat pe kahā qudsī se rizvāñ ne yahī

jaane kis ḳhvāb meñ thā 'barq' jagāne se uThā

dil na baiThe use duniya ke KHazane se uTha

dekh ek shai bhi na is aaina-KHane se uTha

naza ka karb hua kaif-e-dam-e-baz-pasin

le ke siski jo koi mere sirhane se uTha

hae ab kaun sahe hans ke mere jaur-o-sitam

shor-e-matam mere marne ka zamane se uTha

ishq ka dard na bardasht karen dasht-o-jabal

bar-e-gham ye bhi magar tere diwane se uTha

tai hui rah-e-wafa jumbish-e-abru ke nisar

zindagi bhar ka tha ek bojh jo shane se uTha

KHun se KHak pe likkhi gai tafsir-e-hayat

ya-husain aap ka nam aur miTane se uTha

dar-e-jannat pe kaha qudsi se rizwan ne yahi

jaane kis KHwab mein tha 'barq' jagane se uTha