dil na kare agar yaqin dil pe hai iKHtiyar kya

dil na kare agar yaqīñ dil pe hai iḳhtiyār kyā

aap pe e.atibār hai va.ade kā e.atibār kyā

raakh paḌī to dab gayā raakh haTī bhaḌak uThā

sho.ale kī raushnī hī kyā sho.ale kā e.atibār kyā

manzil-e-ġham kā ban gayā rāh-numā junūn-e-shauq

hosh kā aasrā ġhalat hosh kā e.atibār kyā

aa.ina aks ke baġhair kaise bhalā chamak sake

jalva-fagan nahīñ huā partav-e-husn-e-yār kyā

kaisā bikhar ke rah gayā husn-e-tilism-e-rang-o-bū

toḌ diyā ḳhizāñ ne aaj ā.ina-e-bahār kyā

hijr kī raat kaT ga.ī yaas meñ aur aas meñ

sub.h-e-payām lā.egī 'aḳhtar'-e-be-qarār kyā

dil na kare agar yaqin dil pe hai iKHtiyar kya

aap pe eatibar hai wade ka eatibar kya

rakh paDi to dab gaya rakh haTi bhaDak uTha

shoale ki raushni hi kya shoale ka eatibar kya

manzil-e-gham ka ban gaya rah-numa junun-e-shauq

hosh ka aasra ghalat hosh ka eatibar kya

aaina aks ke baghair kaise bhala chamak sake

jalwa-fagan nahin hua partaw-e-husn-e-yar kya

kaisa bikhar ke rah gaya husn-e-tilism-e-rang-o-bu

toD diya KHizan ne aaj aaina-e-bahaar kya

hijr ki raat kaT gai yas mein aur aas mein

subh-e-payam laegi 'aKHtar'-e-be-qarar kya