dil ne jab bhi tera KHayal kiya

dil ne jab bhī tirā ḳhayāl kiyā

ḳhud ko ā.īna-e-jamāl kiyā

dil kī dhaḌkan meñ bas gayā aise

saañs lenā mirā muhāl kiyā

maiñ ne sach bolne kī jur.at kī

sach sunā aap ne kamāl kiyā

terī yādeñ mirī muhāfiz haiñ

terī yādoñ ko maiñ ne Dhaal kiyā

terī chāhat ke lamhe lamhe ko

dil ne mānind-e-māh-o-sāl kiyā

vaqt ne kab use rakhā zinda

kaam jis ne jo be-ma.āl kiyā

terī qurbat meñ biite lamhoñ ne

mujh ko bhī sāhab-e-jamāl kiyā

aa.ine ne tirā qasīda kahā

aa.ina jab kabhī misāl kiyā

ek hī thā javāb husn ke paas

husn se jis ne bhī savāl kiyā

zindagī kā hai sāneha 'rūmī'

dil kī tanhā.ī ne niDhāl kiyā

dil ne jab bhi tera KHayal kiya

KHud ko aaina-e-jamal kiya

dil ki dhaDkan mein bas gaya aise

sans lena mera muhaal kiya

main ne sach bolne ki jurat ki

sach suna aap ne kamal kiya

teri yaaden meri muhafiz hain

teri yaadon ko main ne Dhaal kiya

teri chahat ke lamhe lamhe ko

dil ne manind-e-mah-o-sal kiya

waqt ne kab use rakha zinda

kaam jis ne jo be-maal kiya

teri qurbat mein bite lamhon ne

mujh ko bhi sahab-e-jamal kiya

aaine ne tera qasida kaha

aaina jab kabhi misal kiya

ek hi tha jawab husn ke pas

husn se jis ne bhi sawal kiya

zindagi ka hai saneha 'rumi'

dil ki tanhai ne niDhaal kiya