dil ne kis manzil-e-be-nam mein chhoDa tha mujhe

dil ne kis manzil-e-be-nām meñ chhoḌā thā mujhe

raat bhar ḳhud mire saa.e ne bhī DhūñDā thā mujhe

mujh ko hasrat ki haqīqat meñ na dekhā us ko

us ko nārāzgī kyuuñ ḳhvāb meñ dekhā thā mujhe

ajnabī ban ke sar-e-rāh milā thā jo abhī

ye vahī shaḳhs hai jis ne kabhī chāhā thā mujhe

jab bhī tanhā.ī mile ā.īna hai yā maiñ huuñ

us ne kis aan se kis aan meñ dekhā thā mujhe

jin se bhāgā thā vahī sūrateñ phir sāmne haiñ

kaun sī qabr meñ duniyā ne utārā thā mujhe

vo faqat mere liye paidā hue haiñ 'shohrat'

kaun sā lamha thā jab vahm ye guzrā thā mujhe

dil ne kis manzil-e-be-nam mein chhoDa tha mujhe

raat bhar KHud mere sae ne bhi DhunDa tha mujhe

mujh ko hasrat ki haqiqat mein na dekha us ko

us ko naraazgi kyun KHwab mein dekha tha mujhe

ajnabi ban ke sar-e-rah mila tha jo abhi

ye wahi shaKHs hai jis ne kabhi chaha tha mujhe

jab bhi tanhai mile aaina hai ya main hun

us ne kis aan se kis aan mein dekha tha mujhe

jin se bhaga tha wahi suraten phir samne hain

kaun si qabr mein duniya ne utara tha mujhe

wo faqat mere liye paida hue hain 'shohrat'

kaun sa lamha tha jab wahm ye guzra tha mujhe