dil o nazar mein tere rup ko basata hua

dil o nazar meñ tire ruup ko basātā huā

tirī galī se guzartā huuñ jagmagātā huā

ġhazal ke phuul mire zehn meñ mahakte hue

tirā ḳhayāl mujhe raat bhar jagātā huā

vo bārgāh-e-adab hai aqīdatoñ kī jagah

maiñ us galī se kyuuñ guzrūñgā ḳhaak uḌātā huā

mire junūñ se harīfoñ ke paañv ukhaḌte hue

maiñ jaan dene ke chakkar meñ jaañ bachātā huā

kise milā tire qadmoñ meñ jaan de denā

maiñ surḳh-rū huā chāhat ke kaam aatā huā

tumhārī yaad mujhe is tarah se lagtī hai

koī charāġh añdhere meñ jhilmilātā huā

hatheliyoñ kī lakīreñ mujhe parakhtī huiiñ

maiñ har qadam pe muqaddar ko āzmātā huā

javāb kyuuñ haiñ sabhī ḳhāmoshī meñ dubke hue

savāl zehn ke āñgan meñ aatā jaatā huā

mire ḳhilāf sabhī sāzisheñ rachīñ jis ne

vo ro rahā hai mirī dāstāñ sunātā huā

hamārī samt lagātār vaar hote hue

use bachāne meñ aksar maiñ choT khātā huā

dil o nazar mein tere rup ko basata hua

teri gali se guzarta hun jagmagata hua

ghazal ke phul mere zehn mein mahakte hue

tera KHayal mujhe raat bhar jagata hua

wo bargah-e-adab hai aqidaton ki jagah

main us gali se kyun guzrunga KHak uData hua

mere junun se harifon ke panw ukhaDte hue

main jaan dene ke chakkar mein jaan bachata hua

kise mila tere qadmon mein jaan de dena

main surKH-ru hua chahat ke kaam aata hua

tumhaari yaad mujhe is tarah se lagti hai

koi charagh andhere mein jhilmilata hua

hatheliyon ki lakiren mujhe parakhti huin

main har qadam pe muqaddar ko aazmata hua

jawab kyun hain sabhi KHamoshi mein dubke hue

sawal zehn ke aangan mein aata jata hua

mere KHilaf sabhi sazishen rachin jis ne

wo ro raha hai meri dastan sunata hua

hamari samt lagatar war hote hue

use bachane mein aksar main choT khata hua