dil par is kakul-e-rasa ki choT

dil par is kākul-e-rasā kī choT

qahr kī choT hai balā kī choT

haiñ vo afsurda merī aahoñ se

phuul ko hai bahut havā kī choT

nigah-e-nāz se ḳhudā kī panāh

kyā bachā.e koī qazā kī choT

āfrīñ dil ko jo uThātā hai

dam-ba-dam ḳhanjar-e-adā kī choT

gir paḌī āsmān se bijlī

hañs ke qātil ne kī balā kī choT

ban ga.ī ḳhuun dast-e-qātil meñ

rañg laa.ī dil-e-hinā kī choT

tīr-e-mizhgāñ chale judā dil par

ġhamza-e-yār ne judā kī choT

baaġh meñ sab bikas ga.iiñ kaliyāñ

na uThī dāman-e-sabā kī choT

dil ye kahtā hai kuchh ḳhatā kar ke

khā.iye dast-e-dil-rubā kī choT

ho gayā māh-e-charḳh do TukḌe

thī ye añgusht-e-mustafā kī choT

ġhair kyā samjhe dard-e-dil ko 'jalīl'

āshnā jaane āshnā kī choT

dil par is kakul-e-rasa ki choT

qahr ki choT hai bala ki choT

hain wo afsurda meri aahon se

phul ko hai bahut hawa ki choT

nigah-e-naz se KHuda ki panah

kya bachae koi qaza ki choT

aafrin dil ko jo uThata hai

dam-ba-dam KHanjar-e-ada ki choT

gir paDi aasman se bijli

hans ke qatil ne ki bala ki choT

ban gai KHun dast-e-qatil mein

rang lai dil-e-hina ki choT

tir-e-mizhgan chale juda dil par

ghamza-e-yar ne juda ki choT

bagh mein sab bikas gain kaliyan

na uThi daman-e-saba ki choT

dil ye kahta hai kuchh KHata kar ke

khaiye dast-e-dil-ruba ki choT

ho gaya mah-e-charKH do TukDe

thi ye angusht-e-mustafa ki choT

ghair kya samjhe dard-e-dil ko 'jalil'

aashna jaane aashna ki choT