dil pareshan hai kya kiya jae

dil pareshāñ hai kyā kiyā jaa.e

aql hairāñ hai kyā kiyā jaa.e

shauq-e-mushkil-pasand un kā husūl

saḳht āsāñ hai kyā kiyā jaa.e

ishq-e-ḳhūbāñ ke saath hī ham meñ

nāz-e-ḳhūbāñ hai kyā kiyā jaa.e

be-sabab hī mirī tabī.at-e-ġham

sab se nālāñ hai kyā kiyā jaa.e

bāvajūd un kī dil-navāzī ke

dil gurezāñ hai kyā kiyā jaa.e

maiñ to naqd-e-hayāt laayā thā

jins-e-arzāñ hai kyā kiyā jaa.e

ham samajhte the ishq ko dushvār

ye bhī āsāñ hai kyā kiyā jaa.e

vo bahāroñ kī nāz-parvarda

ham pe nāzāñ hai kyā kiyā jaa.e

misr-e-lutf-o-karam meñ bhī ai 'jaun'

yād-e-kan.āñ hai kyā kiyā jaa.e

dil pareshan hai kya kiya jae

aql hairan hai kya kiya jae

shauq-e-mushkil-pasand un ka husul

saKHt aasan hai kya kiya jae

ishq-e-KHuban ke sath hi hum mein

naz-e-KHuban hai kya kiya jae

be-sabab hi meri tabiat-e-gham

sab se nalan hai kya kiya jae

bawajud un ki dil-nawazi ke

dil gurezan hai kya kiya jae

main to naqd-e-hayat laya tha

jins-e-arzan hai kya kiya jae

hum samajhte the ishq ko dushwar

ye bhi aasan hai kya kiya jae

wo bahaaron ki naz-parwarda

hum pe nazan hai kya kiya jae

misr-e-lutf-o-karam mein bhi ai 'jaun'

yaad-e-kanan hai kya kiya jae