dil phir us kuche mein jaane wala hai

dil phir us kūche meñ jaane vaalā hai

baiThe-biThā.e Thokar khāne vaalā hai

tark-e-ta.alluq kā dhaḌkā sā hai dil ko

vo mujh ko ik baat batāne vaalā hai

kitne adab se baiThe haiñ sūkhe paude

jaise bādal sher sunāne vaalā hai

ye mat soch sarā.e par kyā bītegī

tū to bas ik raat bitāne vaalā hai

īñToñ ko aapas meñ milāne vaalā shaḳhs

asl meñ ik dīvār uThāne vaalā hai

gaaḌī kī raftār meñ aa.ī hai sustī

shāyad ab station aane vaalā hai

āḳhrī hichkī lenī hai ab aa jaao

ba.ad meñ tum ko kaun bulāne vaalā hai

dil phir us kuche mein jaane wala hai

baiThe-biThae Thokar khane wala hai

tark-e-talluq ka dhaDka sa hai dil ko

wo mujh ko ek baat batane wala hai

kitne adab se baiThe hain sukhe paude

jaise baadal sher sunane wala hai

ye mat soch sarae par kya bitegi

tu to bas ek raat bitane wala hai

inTon ko aapas mein milane wala shaKHs

asl mein ek diwar uThane wala hai

gaDi ki raftar mein aai hai susti

shayad ab station aane wala hai

aaKHri hichki leni hai ab aa jao

baad mein tum ko kaun bulane wala hai