dil se har naqsh-e-tamanna ko miTa deta hai

dil se har naqsh-e-tamannā ko miTā detā hai

ġham-e-jānāñ ġham-e-duniyā ko bhulā detā hai

husn kā ro.ab hai vo ro.ab ke jis ke aage

ishq-e-ḳhud.dār bhī sar apnā jhukā detā hai

ik e.ajāz hai tere lab-e-rā.anā kā sukūt

jo ḳhamoshī meñ takallum kā mazā detā hai

mujh se iflās ke bedād kī tashrīh na pūchh

bas ye insān ko maflūj banā detā hai

zauq-e-nazzāra pur-asrār chaman ke ruḳh se

rang-o-nik.hat ke hijābāt uThā detā hai

haa.e kyā chiiz hai ye dard-e-mohabbat 'nāshād'

pichhlī rātoñ ko mirī niiñd uḌā detā hai

dil se har naqsh-e-tamanna ko miTa deta hai

gham-e-jaanan gham-e-duniya ko bhula deta hai

husn ka roab hai wo roab ke jis ke aage

ishq-e-KHuddar bhi sar apna jhuka deta hai

ek eajaz hai tere lab-e-raana ka sukut

jo KHamoshi mein takallum ka maza deta hai

mujh se iflas ke bedad ki tashrih na puchh

bas ye insan ko mafluj bana deta hai

zauq-e-nazzara pur-asrar chaman ke ruKH se

rang-o-nikhat ke hijabaat uTha deta hai

hae kya chiz hai ye dard-e-mohabbat 'nashad'

pichhli raaton ko meri nind uDa deta hai