dil se na wahi aur hain manzar na hamin aur

dil se na vahī aur haiñ 'manzar' na hamīñ aur

ye vaqt hai jo ham haiñ kahīñ aur vo kahīñ aur

hañs kar nahīñ ab ruuTh ke ik baar nahīñ aur

ġhussa karo ġhussa karo ban jaao hasīñ aur

sab vahm thā duniyā thī falak thā na zamīñ aur

jab aa.ina dekhā to nazar aa.e hamīñ aur hamīñ aur

merā to salām us ko bahār-e-dar-e-jānāñ

tujh se agar achchhī koī jannat hai kahīñ aur

iqrār se inkār ke andāz haiñ dilkash

tum yuuñ hī kahe jaao nahīñ aur nahīñ aur

vā'doñ meñ tire ho rahī hai jitnī bhī tāḳhīr

hotā chalā jaatā hai mujhe utnā yaqīñ aur

mālik mujhe rusvā.ī-e-mahshar se bachā le

denā hoñ jo de le vo sazā.eñ bhī yahīñ aur

TuuTe na magar silsila-e-daur-e-mohabbat

mujh ko na pilāo to piye jaao tumhīñ aur

ai lucknow ke phūlo na 'manzar' ko satāo

ghabrā ke chalā jaa.e na be-chāra kahīñ aur

dil se na wahi aur hain 'manzar' na hamin aur

ye waqt hai jo hum hain kahin aur wo kahin aur

hans kar nahin ab ruTh ke ek bar nahin aur

ghussa karo ghussa karo ban jao hasin aur

sab wahm tha duniya thi falak tha na zamin aur

jab aaina dekha to nazar aae hamin aur hamin aur

mera to salam us ko bahaar-e-dar-e-jaanan

tujh se agar achchhi koi jannat hai kahin aur

iqrar se inkar ke andaz hain dilkash

tum yun hi kahe jao nahin aur nahin aur

wa'don mein tere ho rahi hai jitni bhi taKHir

hota chala jata hai mujhe utna yaqin aur

malik mujhe ruswai-e-mahshar se bacha le

dena hon jo de le wo sazaen bhi yahin aur

TuTe na magar silsila-e-daur-e-mohabbat

mujh ko na pilao to piye jao tumhin aur

ai lucknow ke phulo na 'manzar' ko satao

ghabra ke chala jae na be-chaara kahin aur