dil se nikli hai dastan shayad

dil se niklī hai dāstāñ shāyad

ek ik harf hai zabāñ shāyad

aao aage qadam baḌhā.eñ zarā

Thahrā Thahrā hai kārvāñ shāyad

mujh ko pahuñchā de merī manzil tak

jazba-e-shauq-e-kāmrāñ shāyad

dil yaqīnan hai saltanat us kī

hai vahī dil pe hukmarāñ shāyad

mustaqil imtihān-gāh meñ huuñ

vo bhī le merā imtihāñ shāyad

aaj Duube haiñ gahrī fikr meñ vo

merī āñkheñ haiñ tarjumāñ shāyad

ham zamīñ par haiñ sirf ik maḳhlūq

āsmāñ par hai āsmāñ shāyad

un ke chehre kī ek ek lakīr

shīshagar kī hai ik dukāñ shāyad

bhuul kar bhī to ḳhat nahīñ likhte

ho ga.e haiñ vo bad-gumāñ shāyad

kārvān-e-hayāt raqs meñ hai

manzileñ ho ga.iiñ ravāñ shāyad

dil samajhte haiñ jis ko ahl-e-ishq

ik shikasta sā hai makāñ shāyad

kuchh hijābāt rah ga.e baaqī

aap ke mere darmiyāñ shāyad

har jagah hai 'razā' vahī maujūd

maiñ jahāñ huuñ vahāñ nahīñ shāyad

dil se nikli hai dastan shayad

ek ek harf hai zaban shayad

aao aage qadam baDhaen zara

Thahra Thahra hai karwan shayad

mujh ko pahuncha de meri manzil tak

jazba-e-shauq-e-kaamran shayad

dil yaqinan hai saltanat us ki

hai wahi dil pe hukmaran shayad

mustaqil imtihan-gah mein hun

wo bhi le mera imtihan shayad

aaj Dube hain gahri fikr mein wo

meri aankhen hain tarjuman shayad

hum zamin par hain sirf ek maKHluq

aasman par hai aasman shayad

un ke chehre ki ek ek lakir

shishagar ki hai ek dukan shayad

bhul kar bhi to KHat nahin likhte

ho gae hain wo bad-guman shayad

karwan-e-hayat raqs mein hai

manzilen ho gain rawan shayad

dil samajhte hain jis ko ahl-e-ishq

ek shikasta sa hai makan shayad

kuchh hijabaat rah gae baqi

aap ke mere darmiyan shayad

har jagah hai 'raza' wahi maujud

main jahan hun wahan nahin shayad