dil se samjhunga ise dushman-e-jaan hone do

dil se samjhūñgā ise dushman-e-jāñ hone do

zahr gholūñgā davā meñ ḳhafaqāñ hone do

aañkh bhauñ us ke ishāroñ pe ravāñ hone do

mil ke abrū-o-mizha tīr-o-kamāñ hone do

mere dil ko hadaf-e-tīr-e-nigah karte haiñ

aur mujh se bhī ishāra hai ki haañ hone do

aag bhaḌkī huī hai mujh ko na samjhā.e koī

jaan kā maal kā hotā hai ziyāñ hone do

har tarah ham dil-e-nā-fahm ko samjhā leñge

daaġh maujūd haiñ pahlū ko ḳhizāñ hone do

ism-e-āzam kā asar ġhair ko dikhlā deñge

yaar kā naam zarā vird-e-zabāñ hone do

āñkheñ phūTeñ bhī kahīñ is falak-e-bad-bīñ kī

zabt achchhā nahīñ aahoñ kā dhuāñ hone do

parda Daalo mirī āñkhoñ pe na ai sharm-o-hijāb

yaar be-parda hai mujh ko nigarāñ hone do

raat baaqī hai abhī kis liye ghabrā ke uThe

top chhuTne do mirī jaan azaañ hone do

lucknow meñ tumheñ dikhlā.eñge chaukā bahte

chaar aañsū mirī āñkhoñ se ravāñ hone do

dekhūñ kyuuñ kar nahīñ hotā falak-e-kaj sīdhā

dil-e-mahzūñ kī buland āh-o-fuġhāñ hone do

ahl-e-duniyā meñ mo.assir hai har ek shai kā rivāj

mast ho jā.eñge sab daur-e-muġhāñ hone do

naujavānī kā mazā koī ḳharābāt meñ hai

mardum-e-pīr ko mushtāq-e-jināñ hone do

āzmā.ish ke nazar hī jo hamāre jānib

paar siine se nigāhoñ kī sināñ hone do

'bahr' ne ab to kamar bāñdhī hī bad-vaza.ī par

ab na roko ise rusvā-e-jahāñ hone do

dil se samjhunga ise dushman-e-jaan hone do

zahr gholunga dawa mein KHafaqan hone do

aankh bhaun us ke ishaaron pe rawan hone do

mil ke abru-o-mizha tir-o-kaman hone do

mere dil ko hadaf-e-tir-e-nigah karte hain

aur mujh se bhi ishaara hai ki han hone do

aag bhaDki hui hai mujh ko na samjhae koi

jaan ka mal ka hota hai ziyan hone do

har tarah hum dil-e-na-fahm ko samjha lenge

dagh maujud hain pahlu ko KHizan hone do

ism-e-azam ka asar ghair ko dikhla denge

yar ka nam zara wird-e-zaban hone do

aankhen phuTen bhi kahin is falak-e-bad-bin ki

zabt achchha nahin aahon ka dhuan hone do

parda Dalo meri aankhon pe na ai sharm-o-hijab

yar be-parda hai mujh ko nigaran hone do

raat baqi hai abhi kis liye ghabra ke uThe

top chhuTne do meri jaan azan hone do

lucknow mein tumhein dikhlaenge chauka bahte

chaar aansu meri aankhon se rawan hone do

dekhun kyun kar nahin hota falak-e-kaj sidha

dil-e-mahzun ki buland aah-o-fughan hone do

ahl-e-duniya mein moassir hai har ek shai ka riwaj

mast ho jaenge sab daur-e-mughan hone do

naujawani ka maza koi KHarabaat mein hai

mardum-e-pir ko mushtaq-e-jinan hone do

aazmaish ke nazar hi jo hamare jaanib

par sine se nigahon ki sinan hone do

'bahr' ne ab to kamar bandhi hi bad-wazai par

ab na roko ise ruswa-e-jahan hone do