kis rang mein bayan karen majra-e-qalb

kis rañg meñ bayān kareñ mājrā-e-qalb

dekhā jo ham ne jalva-e-hairat-fazā-e-qalb

vo jāntā hai vus.at-e-mashrab ke raaz ko

dekhā hai jis ne ālam-e-be-intihā-e-qalb

yārab ye qalb-e-hai.at-e-qalbī ajiib hai

nairañg dekhte haiñ ye kyā ai ḳhudā-e-qalb

ye zamzama tuyūr-e-ḳhush-āhañg kā nahīñ

hai naġhma-sañj bulbul-e-rañgīñ-navā-e-qalb

raushan-zamīr haiñ ye tire ḳhāksār-e-ishq

rakhte haiñ faiz-e-ishq se nūr-o-safā-e-qalb

sālik baqā-e-ishq use kab nasīb ho

jis ke sulūk meñ na huī ho fanā-e-qalb

tābāñ hai dil meñ mahr-e-daraḳhshān-e-ma.arifat

nūr-ul-qulūb hai ye hamārī ziyā-e-qalb

ushshāq jo tasavvur-e-barzaḳh ke ho ga.e

aatī hai dam-ba-dam ye unhīñ ko sadā-e-qalb

qalb-e-shahīd meñ hai tajallī-e-husn-e-yār

mushtāq-e-jalva kyuuñ na hoñ dil se fidā-e-qalb

sāhab-diloñ ko haq ne diyā hai huzūr-e-qalb

maqbūl kis tarah se nahīñ ho duā-e-qalb

ye shauq-o-ram kī bhūl-bhulayyāñ ajiib hai

nairañg-e-rañg hai haram-e-dil-kushā-e-qalb

jis par paḌī jahāñ meñ abul-vaqt kī nigāh

us ko milā hai aa.ina gītī-numā-e-qalb

haiñ āftāb nār-e-mohabbat ke soḳhta

sohbat meñ un kī hotī hai 'sāqī' jilā-e-qalb

kis rang mein bayan karen majra-e-qalb

dekha jo hum ne jalwa-e-hairat-faza-e-qalb

wo jaanta hai wusat-e-mashrab ke raaz ko

dekha hai jis ne aalam-e-be-intiha-e-qalb

yarab ye qalb-e-haiat-e-qalbi ajib hai

nairang dekhte hain ye kya ai KHuda-e-qalb

ye zamzama tuyur-e-KHush-ahang ka nahin

hai naghma-sanj bulbul-e-rangin-nawa-e-qalb

raushan-zamir hain ye tere KHaksar-e-ishq

rakhte hain faiz-e-ishq se nur-o-safa-e-qalb

salik baqa-e-ishq use kab nasib ho

jis ke suluk mein na hui ho fana-e-qalb

taban hai dil mein mahr-e-daraKHshan-e-marifat

nur-ul-qulub hai ye hamari ziya-e-qalb

ushshaq jo tasawwur-e-barzaKH ke ho gae

aati hai dam-ba-dam ye unhin ko sada-e-qalb

qalb-e-shahid mein hai tajalli-e-husn-e-yar

mushtaq-e-jalwa kyun na hon dil se fida-e-qalb

sahab-dilon ko haq ne diya hai huzur-e-qalb

maqbul kis tarah se nahin ho dua-e-qalb

ye shauq-o-ram ki bhul-bhulayyan ajib hai

nairang-e-rang hai haram-e-dil-kusha-e-qalb

jis par paDi jahan mein abul-waqt ki nigah

us ko mila hai aaina giti-numa-e-qalb

hain aaftab nar-e-mohabbat ke soKHta

sohbat mein un ki hoti hai 'saqi' jila-e-qalb