sau qisson se behtar hai kahani mere dil ki

sau qissoñ se behtar hai kahānī mire dil kī

sun us ko tū ai jaan zabānī mire dil kī

har naale meñ yaañ TukḌe jigar hotā hai bulbul

āsān nahīñ tarz uḌānī mire dil kī

honī hai shahīd ek na ik roz tamannā

mauqūf ho kyā marsiya-ḳhvānī mire dil kī

piirī meñ bhī miltā hai jo kam-sin koī mahbūb

kartī hai vahīñ uud javānī mire dil kī

taqsīm kiye pāra-e-dil bazm-e-butāñ meñ

har ek ke hai paas nishānī mire dil kī

ik baat meñ ho jaa.e musaḳhḳhar vo parī-rū

suntā hī nahīñ sehr-bayānī mire dil kī

hai abr to kyā chāhe falak ko bhī jalā de

bijlī meñ kahāñ shola-fishānī mire dil kī

zulfoñ meñ kiyā qaid na abrū se kiyā qatl

tū ne to koī baat na maanī mire dil kī

ye bār-e-ġham-e-ishq samāyā hai ki 'nāsiḳh'

hai koh se dah-chand girānī mire dil kī

sau qisson se behtar hai kahani mere dil ki

sun us ko tu ai jaan zabani mere dil ki

har nale mein yan TukDe jigar hota hai bulbul

aasan nahin tarz uDani mere dil ki

honi hai shahid ek na ek roz tamanna

mauquf ho kya marsiya-KHwani mere dil ki

piri mein bhi milta hai jo kam-sin koi mahbub

karti hai wahin ud jawani mere dil ki

taqsim kiye para-e-dil bazm-e-butan mein

har ek ke hai pas nishani mere dil ki

ek baat mein ho jae musaKHKHar wo pari-ru

sunta hi nahin sehr-bayani mere dil ki

hai abr to kya chahe falak ko bhi jala de

bijli mein kahan shola-fishani mere dil ki

zulfon mein kiya qaid na abru se kiya qatl

tu ne to koi baat na mani mere dil ki

ye bar-e-gham-e-ishq samaya hai ki 'nasiKH'

hai koh se dah-chand girani mere dil ki