dil sine mein betab hai dildar kidhar hai

dil siine meñ betāb hai dildār kidhar hai

kui mujh ko batā do vo mirā yaar kidhar hai

ham kab ke chaman-zār meñ behosh paḌe haiñ

ma.alūm nahīñ gul kidhar aur ḳhaar kidhar hai

us gul kā patā gar nahīñ dete ho to yaaro

itnā to batā do dar-e-gulzār kidhar hai

dil chīnne vaale koī ghar baiTh raheñ haiñ

pūchheñ haiñ yahī rasta-e-bāzār kidhar hai

dekhā mujhe kal us ne to ġhairoñ se ye bolā

laao bhī shitābī mirī talvār kidhar hai

yaañ ho rahā hai siina mirā aagū hī chhalnī

DhūñDe hai kahāñ tiir ko sofār kidhar hai

ahvāl nipaT tañg hai bīmār kā tere

is vaqt tū ai ā.īna-ruḳhsār kidhar hai

shīrīñ-suḳhanāñ sab hī shukr becheñ haiñ lekin

insāf karo josh-e-ḳharīdār kidhar hai

barsoñ na mile us se to us shoḳh ne ham ko

pūchhā na kabhī 'mus.hafī'-e-zār kidhar hai

dil sine mein betab hai dildar kidhar hai

kui mujh ko bata do wo mera yar kidhar hai

hum kab ke chaman-zar mein behosh paDe hain

malum nahin gul kidhar aur KHar kidhar hai

us gul ka pata gar nahin dete ho to yaro

itna to bata do dar-e-gulzar kidhar hai

dil chinne wale koi ghar baiTh rahen hain

puchhen hain yahi rasta-e-bazar kidhar hai

dekha mujhe kal us ne to ghairon se ye bola

lao bhi shitabi meri talwar kidhar hai

yan ho raha hai sina mera aagu hi chhalni

DhunDe hai kahan tir ko sofar kidhar hai

ahwal nipaT tang hai bimar ka tere

is waqt tu ai aaina-ruKHsar kidhar hai

shirin-suKHanan sab hi shukr bechen hain lekin

insaf karo josh-e-KHaridar kidhar hai

barson na mile us se to us shoKH ne hum ko

puchha na kabhi 'mushafi'-e-zar kidhar hai