dil silsila-e-shauq ki tashhir bhi chahe

dil silsila-e-shauq kī tash.hīr bhī chāhe

zanjīr bhī āvāza-e-zanjīr bhī chāhe

ārām kī sūrat nazar aa.e to kuchh insāñ

nairañg-e-shab-o-roz meñ taġh.īr bhī chāhe

saudā-e-talab ko na tavakkul ke evaz de

ye shart to ḳhud ḳhāliq-e-taqdīr bhī chāhe

lāzim hai mohabbat hī mohabbat kā badal ho

tasvīr jo dekhe use tasvīr bhī chāhe

ik pal meñ badalte haiñ ḳhad-o-ḳhāl lahū ke

aañkh apne kisī ḳhvāb kī ta.abīr bhī chāhe

lahja to badal chubhtī huī baat se pahle

tiir aisā to kuchh ho jise naḳhchīr bhī chāhe

tāsīr se ḳhālī to suḳhan nañg hai 'gauhar'

shā.er ko atā ho sanad-e-'mīr' bhī chāhe

dil silsila-e-shauq ki tashhir bhi chahe

zanjir bhi aawaza-e-zanjir bhi chahe

aaram ki surat nazar aae to kuchh insan

nairang-e-shab-o-roz mein taghir bhi chahe

sauda-e-talab ko na tawakkul ke ewaz de

ye shart to KHud KHaliq-e-taqdir bhi chahe

lazim hai mohabbat hi mohabbat ka badal ho

taswir jo dekhe use taswir bhi chahe

ek pal mein badalte hain KHad-o-KHal lahu ke

aankh apne kisi KHwab ki tabir bhi chahe

lahja to badal chubhti hui baat se pahle

tir aisa to kuchh ho jise naKHchir bhi chahe

tasir se KHali to suKHan nang hai 'gauhar'

shaer ko ata ho sanad-e-'mir' bhi chahe