dil-sitani dilrubai par ghamanD

dil-sitānī dilrubā.ī par ghamanD

aap ko hai ḳhush-adā.ī par ghamanD

jāntā huuñ us kā nibhnā hai muhāl

kyā karūñ maiñ pārsā.ī par ghamanD

naaz hai qātil ko apnī teġh par

teġh ko hai kaj-adā.ī par ghamanD

rahm un ko hāl-e-ġham par aa gayā

dil kare be-dast-o-pā.ī par ghamanD

āsiyoñ ko rahmat-e-haq par ġhurūr

zāhidoñ ko jab.ha-sā.ī par ghamanD

guftugū bhī mujh se tum karte nahīñ

is qadar is ḳhush-adā.ī par ghamanD

parda-e-dar par kisī ko naaz hai

ham ko nazroñ kī rasā.ī par ghamanD

ab unheñ hai dil-navāzī kā ḳhayāl

thā jinheñ teġh-āzmā.ī par ghamanD

phir giraftār-e-qafas ho jā.ūñgā

hai abas mujh ko rihā.ī par ghamanD

ho gayā jis ke sabab se maiñ asiir

thā mujhe us ḳhush-navā.ī par ghamanD

ġharq kar degā unheñ tūfān-e-ishq

'nūh' ko hai nā-ḳhudā.ī par ghamanD

dil-sitani dilrubai par ghamanD

aap ko hai KHush-adai par ghamanD

jaanta hun us ka nibhna hai muhaal

kya karun main parsai par ghamanD

naz hai qatil ko apni tegh par

tegh ko hai kaj-adai par ghamanD

rahm un ko haal-e-gham par aa gaya

dil kare be-dast-o-pai par ghamanD

aasiyon ko rahmat-e-haq par ghurur

zahidon ko jabha-sai par ghamanD

guftugu bhi mujh se tum karte nahin

is qadar is KHush-adai par ghamanD

parda-e-dar par kisi ko naz hai

hum ko nazron ki rasai par ghamanD

ab unhen hai dil-nawazi ka KHayal

tha jinhen tegh-azmai par ghamanD

phir giraftar-e-qafas ho jaunga

hai abas mujh ko rihai par ghamanD

ho gaya jis ke sabab se main asir

tha mujhe us KHush-nawai par ghamanD

gharq kar dega unhen tufan-e-ishq

'nuh' ko hai na-KHudai par ghamanD