dil toD kar wo dil mein pashiman hua to kya

dil toḌ kar vo dil meñ pashīmāñ huā to kyā

ik be-niyāz-e-nāz pe ehsāñ huā to kyā

apnā ilāj-e-tañgi-e-dil vo na kar sake

merā ilāj-e-tañgi-e-dāmāñ huā to kyā

jab bāl-o-par hī nazr-e-qafas ho ke rah ga.e

sehn-e-chaman meñ shor-e-bahārāñ huā to kyā

ik umr rakh ke ruuh mirī tishna-e-nashāt

ab naġhma-e-hayāt par-afshāñ huā to kyā

jab mere vāste dar-e-mai-ḳhāna band hai

sahbā meñ ġharq ālam-e-imkāñ huā to kyā

TuuTe paḌe haiñ sāz-e-mohabbat ke taar taar

ab shāhid-e-ḳhayāl ġhazal-ḳhvāñ huā to kyā

aadam ne ek ḳhosha-e-gandum ko kyā kiyā

mujrim kabhī jo bhuuk se insāñ huā to kyā

'vāmiq' kī tīra-baḳhtī kā aalam vahī rahā

zulmat-kade meñ chashma-e-haivāñ huā to kyā

dil toD kar wo dil mein pashiman hua to kya

ek be-niyaz-e-naz pe ehsan hua to kya

apna ilaj-e-tangi-e-dil wo na kar sake

mera ilaj-e-tangi-e-daman hua to kya

jab baal-o-par hi nazr-e-qafas ho ke rah gae

sehn-e-chaman mein shor-e-bahaaran hua to kya

ek umr rakh ke ruh meri tishna-e-nashat

ab naghma-e-hayat par-afshan hua to kya

jab mere waste dar-e-mai-KHana band hai

sahba mein gharq aalam-e-imkan hua to kya

TuTe paDe hain saz-e-mohabbat ke tar tar

ab shahid-e-KHayal ghazal-KHwan hua to kya

aadam ne ek KHosha-e-gandum ko kya kiya

mujrim kabhi jo bhuk se insan hua to kya

'wamiq' ki tira-baKHti ka aalam wahi raha

zulmat-kade mein chashma-e-haiwan hua to kya