dil wo pyasa hai ki dariya ka tamasha dekhe

dil vo pyāsā hai ki dariyā kā tamāshā dekhe

aur phir lahr na dekhe kaf-e-dariyā dekhe

maiñ har ik haal meñ thā gardish-e-daurāñ kā amiiñ

jis ne duniyā nahīñ dekhī mirā chehra dekhe

ab bhī aatī hai tirī yaad pa is karb ke saath

TūTtī niiñd meñ jaise koī sapnā dekhe

rañg kī aañch meñ jaltā huā ḳhushbū kā badan

aañkh us phuul kī tasvīr meñ kyā kyā dekhe

koī choTī nahīñ ab to mire qad se aage

ye zamāna to abhī aur bhī ūñchā dekhe

phir vahī dhund meñ lipTā huā paikar hogā

kaun be-kār meñ uThtā huā parda dekhe

ek ehsās-e-nadāmt se laraz uThtā huuñ

jab ram-e-mauj mirī vus.at-e-sahrā dekhe

dil wo pyasa hai ki dariya ka tamasha dekhe

aur phir lahr na dekhe kaf-e-dariya dekhe

main har ek haal mein tha gardish-e-dauran ka amin

jis ne duniya nahin dekhi mera chehra dekhe

ab bhi aati hai teri yaad pa is karb ke sath

TuTti nind mein jaise koi sapna dekhe

rang ki aanch mein jalta hua KHushbu ka badan

aankh us phul ki taswir mein kya kya dekhe

koi choTi nahin ab to mere qad se aage

ye zamana to abhi aur bhi uncha dekhe

phir wahi dhund mein lipTa hua paikar hoga

kaun be-kar mein uThta hua parda dekhe

ek ehsas-e-nadamt se laraz uThta hun

jab ram-e-mauj meri wusat-e-sahra dekhe