دلوں میں حسن یقیں تو کجا گماں بھی نہیں

دلوں میں حسن یقیں تو کجا گماں بھی نہیں

تم آگ ڈھونڈھ رہے ہو یہاں دھواں بھی نہیں

جلا سکے گی اسے برق نا گہاں بھی نہیں

خودی قوی ہو تو خطرے میں آشیاں بھی نہیں

کھڑے ہیں دشت تحیر میں ہم کدھر جائیں

جرس کا شور تو کیا گرد کارواں بھی نہیں

فلک پہ کوند رہی ہے نہ جانے کیوں بجلی

چمن میں اب تو مری خاک آشیاں بھی نہیں

ملا ہے خلعت عریانیٔ جنوں صد شکر

بلا سے تن پہ گریباں کی دھجیاں بھی نہیں

قفس سے چھوٹ کے اے بیکسی کہاں جاؤں

شکستہ بال بھی ہوں یاد آشیاں بھی نہیں

ہزاروں ہیں تری محفل میں زمزمہ پرداز

فغاں کہ میرے لئے رخصت فغاں بھی نہیں

پڑی ہے جلوہ گۂ دیر و کعبہ اب ویراں

جمال یار یہاں بھی نہیں وہاں بھی نہیں

جبین شوق ہے دنیائے عشق میں رسوا

نصیب اس کو تری خاک آستاں بھی نہیں

اڑا کے لے چل اسی کو چمن میں او پر و بال

گراں قفس بھی نہیں دور آشیاں بھی نہیں

قمار عشق میں حاصل ہے لذت جاوید

نہیں جو سود کچھ اس میں نہ ہو زیاں بھی نہیں

غم جہاں نے ستایا ہے اس قدر مجھ کو

کہ دل میں یاد بتاں کیا غم بتاں بھی نہیں

ادھر ہے درپئے تخریب آشیاں صیاد

ادھر تصور تعمیر آشیاں بھی نہیں

اب ایسی ناؤ پہ موجوں کا ہم سفر ہوں میں

کہ ناخدا بھی نہیں اور بادباں بھی نہیں

وجود برق ہے تعمیر آشیاں سے ولیؔ

اگر بہار نہیں موسم خزاں بھی نہیں