دن عیش کے تھے زندگی مست شباب تھی

دن عیش کے تھے زندگی مست شباب تھی

دل پیالۂ طلائی محبت شراب تھی

اک شخص ہی سے حرف و حکایت میں رنگ تھا

ورنہ یہ کائنات تو بوجھل کتاب تھی

امکان بھر تو کچھ بھی نہ تھا جز غبار و خاک

ایمان بھر ہر ایک دعا مستجاب تھی

اک صاحب نصاب کے صدقے پہ تھا گزر

کیا دولت غرور ہمیں دستیاب تھی

ہیجان راکھ ہو کے کہیں منتشر ہوا

اور تن گزیدہ روح کہیں زیر آب تھی

حاصل یہی ہے عمر گزشتہ کے باب کا

تھے دل فریب تم مری دنیا خراب تھی