din-ba-din ab lutf tera hum pe kam hone laga

din-ba-din ab lutf terā ham pe kam hone lagā

yā to thā vaisā karam yā ye sitam hone lagā

sach kaho taqsīr kyā hai āshiq-e-mazlūm kī

nīmchā tirchhī nigah kā kyuuñ alam hone lagā

teġh-e-abrū kuuñ nipaT kaste ho pan hairāñ huuñ maiñ

kaun se bīmār par ye aab dam hone lagā

shukr-e-allah sarv-e-rānā ke tasavvur ke tufail

rafta rafta dil mirā bāġh-e-iram hone lagā

bas karo ai shāh-e-fauj-e-husn qatl-e-ām kuuñ

āshiqoñ kī aah kā neza alam hone lagā

tujh kuuñ ai āhū-nigah kis ne sikhāyā ye tarah

yā to thā auroñ siiñ ram yā ham siiñ ram hone lagā

hijr kī rātoñ meñ ye misra.a huā vird-e-'sirāj'

din-ba-din ab lutf terā ham pe kam hone lagā

din-ba-din ab lutf tera hum pe kam hone laga

ya to tha waisa karam ya ye sitam hone laga

sach kaho taqsir kya hai aashiq-e-mazlum ki

nimcha tirchhi nigah ka kyun alam hone laga

tegh-e-abru kun nipaT kaste ho pan hairan hun main

kaun se bimar par ye aab dam hone laga

shukr-e-allah sarw-e-rana ke tasawwur ke tufail

rafta rafta dil mera bagh-e-iram hone laga

bas karo ai shah-e-fauj-e-husn qatl-e-am kun

aashiqon ki aah ka neza alam hone laga

tujh kun ai aahu-nigah kis ne sikhaya ye tarah

ya to tha auron sin ram ya hum sin ram hone laga

hijr ki raaton mein ye misra hua wird-e-'siraj'

din-ba-din ab lutf tera hum pe kam hone laga