din Dhal chuka hai aur wahi naqsha hai dhup ka

din Dhal chukā hai aur vahī naqsha hai dhuup kā

ye shaġhl-e-ḳhud-numā.ī bhī achchhā hai dhuup kā

parde pe aañkh ke jo sitāra thā bujh gayā

kirdār is kahānī meñ kyā kyā hai dhuup kā

do ek bol Dūbte sūraj kī zau pe bhī

ye āḳhirī varaq abhī saada hai dhuup kā

ik lahr jaag uThtī hai is dil meñ sub.h-dam

jis par safīna tairtā rahtā hai dhuup kā

tasvīr din kī chhoḌ bhī sakte haiñ nā-tamām

paimāna ham se kho bhī to saktā hai dhuup kā

ye aañkh dam-ba-dam kisī lau ke asar meñ hai

is aa.ine pe bhī hameñ dhoka hai dhuup kā

kuchh dauḌ-dhūp aur bhī dil kī zamīn par

is ruḳh pe maujzan abhī dariyā hai dhuup kā

din Dhal chuka hai aur wahi naqsha hai dhup ka

ye shaghl-e-KHud-numai bhi achchha hai dhup ka

parde pe aankh ke jo sitara tha bujh gaya

kirdar is kahani mein kya kya hai dhup ka

do ek bol Dubte suraj ki zau pe bhi

ye aaKHiri waraq abhi sada hai dhup ka

ek lahr jag uThti hai is dil mein subh-dam

jis par safina tairta rahta hai dhup ka

taswir din ki chhoD bhi sakte hain na-tamam

paimana hum se kho bhi to sakta hai dhup ka

ye aankh dam-ba-dam kisi lau ke asar mein hai

is aaine pe bhi hamein dhoka hai dhup ka

kuchh dauD-dhup aur bhi dil ki zamin par

is ruKH pe maujzan abhi dariya hai dhup ka