din Dhala jata hai sham aati hai ghabraata hun main

din Dhalā jaatā hai shaam aatī hai ghabrātā huuñ maiñ

Dūbtā jaatā hai sūraj Dūbtā jaatā huuñ maiñ

ik Thikāna thā jahāñ bahlā liyā kartā thā dil

aaj us mahfil ko bhī zer-o-zabar paatā huuñ maiñ

aa ga.ī hai yaad aaj apne dil-e-marhūm kī

saarī duniyā sog meñ Duubī huī paatā huuñ maiñ

merī guzrī zindagī āvāz detī hai mujhe

ai muġhannī band kar naġhma ki ghabrātā huuñ maiñ

rafta rafta ishq is manzil meñ laayā hai mujhe

dard uThtā hai kisī ko aur taḌap jaatā huuñ maiñ

tum vahī mahfil vahī mahfil kī ra.anā.ī vahī

in dinoñ kuchh apne hī ko dūsrā paatā huuñ maiñ

ye safedī hai sahar kī yā tamannā kā kafan

haa.e kyā paanā thā kyā vaqt-e-sahar paatā huuñ maiñ

raushnī detā huuñ sab ko ik bujhe dil se 'nazīr'

apnī sard aahoñ se har mahfil ko garmātā huuñ maiñ

din Dhala jata hai sham aati hai ghabraata hun main

Dubta jata hai suraj Dubta jata hun main

ek Thikana tha jahan bahla liya karta tha dil

aaj us mahfil ko bhi zer-o-zabar pata hun main

aa gai hai yaad aaj apne dil-e-marhum ki

sari duniya sog mein Dubi hui pata hun main

meri guzri zindagi aawaz deti hai mujhe

ai mughanni band kar naghma ki ghabraata hun main

rafta rafta ishq is manzil mein laya hai mujhe

dard uThta hai kisi ko aur taDap jata hun main

tum wahi mahfil wahi mahfil ki ranai wahi

in dinon kuchh apne hi ko dusra pata hun main

ye safedi hai sahar ki ya tamanna ka kafan

hae kya pana tha kya waqt-e-sahar pata hun main

raushni deta hun sab ko ek bujhe dil se 'nazir'

apni sard aahon se har mahfil ko garmata hun main