din guzarta hai talash-e-yar mein

din guzartā hai talāsh-e-yār meñ

kaTtī hai shab hasrat-e-dīdār meñ

jins-e-dil hai paas to gāhak bahut

koī aa hī jā.egā bāzār meñ

kis ke naqsh-e-pā ke yā-rab hai nishāñ

gul khile haiñ kūcha-e-aġhyār meñ

haa.e jazb-e-ishq kī nairangiyāñ

hazrat-e-yūsuf bike bāzār meñ

dekhne ko haal kab aa.e haiñ aap

haal jab baaqī nahīñ bāzār meñ

ab shabāb aaya to farq aane lagā

aap kī guftār meñ raftār meñ

shahr meñ huuñ kyā kamī mā'shūq kī

ḳhūb-rū haiñ saiñkaḌoñ bāzār meñ

shauq se bismil ragaḌte haiñ galā

kyā maza hai aap kī talvār meñ

DhūñD hai kis ne likhā ye hāl-e-dil

ek katba hai nayā dīvār meñ

haa.e re hālat umīd-o-bīm kī

merī kashtī aaj hai mañjdhār meñ

milne ko milte haiñ lākhoñ aadmī

ādamiyyat miltī hai do-chār meñ

dil-faroshoñ kī do-rūya bhiiḌ hai

sair ko nikle haiñ vo bāzār meñ

maan lo merī ḳhudā ko maan kar

raat āḳhir ho ga.ī takrār meñ

barg-e-gul samjhī tire muñh kā ugaal

us ko bulbul le uḌī minqār meñ

kab bujhī is se mire dil kī lagī

aab hai to ho tirī talvār meñ

dil ko bahlāyā ḳhayāl-e-yār se

mashġhala ye thā firāq-e-yār meñ

vo bhī bad-ḳhū ye bhī hai nāzuk-mizāj

ho na kuchh jhagḌā dil-o-dildār meñ

laakh sehat us pe qurbāñ kījiye

vo maza hai ishq ke bāzār meñ

ḳhair darbāñ to vahāñ jaane na de

paḌ raheñge sāya-e-dīvār meñ

husn us parda-nashīñ kā hai kuchh aur

yuuñ to haiñ lākhoñ hasīñ bāzār meñ

haa.e kab maqtal meñ laa.e haiñ mujhe

dam hī jab baaqī nahīñ talvār meñ

pī bahut ab ḳhauf be-kaifī kā hai

sāqiyā thoḌī sī de miqdār meñ

ab vo samjhe garmī-e-ḳhūn-e-shahīd

jabki chhāle paḌ ga.e talvār meñ

kab kisī kī baat sunte haiñ 'ḳhayāl'

vo to be-ḳhud haiñ ḳhayāl-e-yār meñ

din guzarta hai talash-e-yar mein

kaTti hai shab hasrat-e-didar mein

jins-e-dil hai pas to gahak bahut

koi aa hi jaega bazar mein

kis ke naqsh-e-pa ke ya-rab hai nishan

gul khile hain kucha-e-aghyar mein

hae jazb-e-ishq ki nairangiyan

hazrat-e-yusuf bike bazar mein

dekhne ko haal kab aae hain aap

haal jab baqi nahin bazar mein

ab shabab aaya to farq aane laga

aap ki guftar mein raftar mein

shahr mein hun kya kami ma'shuq ki

KHub-ru hain sainkaDon bazar mein

shauq se bismil ragaDte hain gala

kya maza hai aap ki talwar mein

DhunD hai kis ne likha ye haal-e-dil

ek katba hai naya diwar mein

hae re haalat umid-o-bim ki

meri kashti aaj hai manjdhaar mein

milne ko milte hain lakhon aadmi

aadamiyyat milti hai do-chaar mein

dil-faroshon ki do-ruya bhiD hai

sair ko nikle hain wo bazar mein

man lo meri KHuda ko man kar

raat aaKHir ho gai takrar mein

barg-e-gul samjhi tere munh ka ugal

us ko bulbul le uDi minqar mein

kab bujhi is se mere dil ki lagi

aab hai to ho teri talwar mein

dil ko bahlaya KHayal-e-yar se

mashghala ye tha firaq-e-yar mein

wo bhi bad-KHu ye bhi hai nazuk-mizaj

ho na kuchh jhagDa dil-o-dildar mein

lakh sehat us pe qurban kijiye

wo maza hai ishq ke bazar mein

KHair darban to wahan jaane na de

paD rahenge saya-e-diwar mein

husn us parda-nashin ka hai kuchh aur

yun to hain lakhon hasin bazar mein

hae kab maqtal mein lae hain mujhe

dam hi jab baqi nahin talwar mein

pi bahut ab KHauf be-kaifi ka hai

saqiya thoDi si de miqdar mein

ab wo samjhe garmi-e-KHun-e-shahid

jabki chhaale paD gae talwar mein

kab kisi ki baat sunte hain 'KHayal'

wo to be-KHud hain KHayal-e-yar mein