din ko mismar hue raat ko tamir hue

din ko mismār hue raat ko tāmīr hue

ḳhvāb hī ḳhvāb faqat ruuh kī jāgīr hue

umr bhar likhte rahe phir bhī varaq saada rahā

jaane kyā lafz the jo ham se na tahrīr hue

ye alag dukh hai ki haiñ tere dukhoñ se āzād

ye alag qaid hai ham kyuuñ nahīñ zanjīr hue

diida o dil meñ tire aks kī tashkīl se ham

dhuul se phuul hue rañg se tasvīr hue

kuchh nahīñ yaad ki shab raqs kī mahfil meñ 'zafar'

ham judā kis se hue kis se baġhal-gīr hue

din ko mismar hue raat ko tamir hue

KHwab hi KHwab faqat ruh ki jagir hue

umr bhar likhte rahe phir bhi waraq sada raha

jaane kya lafz the jo hum se na tahrir hue

ye alag dukh hai ki hain tere dukhon se aazad

ye alag qaid hai hum kyun nahin zanjir hue

dida o dil mein tere aks ki tashkil se hum

dhul se phul hue rang se taswir hue

kuchh nahin yaad ki shab raqs ki mahfil mein 'zafar'

hum juda kis se hue kis se baghal-gir hue