din mein suraj hai meri mahrumiyon ka tarjuman

din meñ sūraj hai mirī mahrūmiyoñ kā tarjumāñ

zulmat-e-shab meñ sitāre hijr o ġham ke rāz-dāñ

chāñd sūraj haiñ parā.e ajnabī hai kahkashāñ

ham faqīroñ ke liye farsh-e-zamīñ hai āsmāñ

jalva-e-māshūq bhī hai ik karishma al-amāñ

saat pardoñ meñ nihāñ ho kar bhī har jānib ayaañ

manzil-e-giryā kahāñ hai chashm-e-tar ko kyā ḳhabar

tā-abad bhaTegā mere āñsuoñ kā kārvāñ

dil ko jaanā thā gayā ik fāltū sī chiiz thā

sīna-e-āshiq meñ yaaro dil kī gunjā.ish kahāñ

bas yahī ik kaam baaqī thā jo karnā hai mujhe

maiñ mohabbat bo rahā huuñ nafratoñ ke darmiyāñ

ye fasāna ishq kā ya.anī ḳhazāna pyaar kā

saath hai tishna azal se dāstāñ-dar-dāstāñ

din mein suraj hai meri mahrumiyon ka tarjuman

zulmat-e-shab mein sitare hijr o gham ke raaz-dan

chand suraj hain parae ajnabi hai kahkashan

hum faqiron ke liye farsh-e-zamin hai aasman

jalwa-e-mashuq bhi hai ek karishma al-aman

sat pardon mein nihan ho kar bhi har jaanib ayan

manzil-e-girya kahan hai chashm-e-tar ko kya KHabar

ta-abad bhaTega mere aansuon ka karwan

dil ko jaana tha gaya ek faltu si chiz tha

sina-e-ashiq mein yaro dil ki gunjaish kahan

bas yahi ek kaam baqi tha jo karna hai mujhe

main mohabbat bo raha hun nafraton ke darmiyan

ye fasana ishq ka yani KHazana pyar ka

sath hai tishna azal se dastan-dar-dastan