din saliqe se uga raat Thikane se rahi

din salīqe se ugā raat Thikāne se rahī

dostī apnī bhī kuchh roz zamāne se rahī

chand lamhoñ ko hī bantī haiñ musavvir āñkheñ

zindagī roz to tasvīr banāne se rahī

is añdhere meñ to Thokar hī ujālā degī

raat jañgal meñ koī sham.a jalāne se rahī

fāsla chāñd banā detā hai har patthar ko

duur kī raushnī nazdīk to aane se rahī

shahr meñ sab ko kahāñ miltī hai rone kī jagah

apnī izzat bhī yahāñ hañsne hañsāne se rahī

din saliqe se uga raat Thikane se rahi

dosti apni bhi kuchh roz zamane se rahi

chand lamhon ko hi banti hain musawwir aankhen

zindagi roz to taswir banane se rahi

is andhere mein to Thokar hi ujala degi

raat jangal mein koi shama jalane se rahi

fasla chand bana deta hai har patthar ko

dur ki raushni nazdik to aane se rahi

shahr mein sab ko kahan milti hai rone ki jagah

apni izzat bhi yahan hansne hansane se rahi