din to jun-tun chalo guzar jae

din to jūñ-tūñ chalo guzar jaa.e

nighrā raat meñ kidhar jaa.e

ye saḌak par paḌā huā ik shaḳhs

is ke siine se car utar jaa.e

ghar se paañv nikal gayā us kā

ab ḳhudā jaane vo kidhar jaa.e

is zamāne meñ zindagī ke liye

soch bhī le koī to mar jaa.e

raat kī fikr to karūñ lekin

sar se ye dhuup to utar jaa.e

aa.ina muñh chiḌā rahā hai mujhe

ḳhud ko jo dekh le to Dar jaa.e

intishār-e-hayāt uf jaise

ā.īna TuuT kar bikhar jaa.e

din to jun-tun chalo guzar jae

nighra raat mein kidhar jae

ye saDak par paDa hua ek shaKHs

is ke sine se car utar jae

ghar se panw nikal gaya us ka

ab KHuda jaane wo kidhar jae

is zamane mein zindagi ke liye

soch bhi le koi to mar jae

raat ki fikr to karun lekin

sar se ye dhup to utar jae

aaina munh chiDa raha hai mujhe

KHud ko jo dekh le to Dar jae

intishaar-e-hayat uf jaise

aaina TuT kar bikhar jae