diya jab dil to dilbar ka gila kya

diyā jab dil to dilbar kā gila kyā

sitam-parvar karam nā-āshnā kyā

na pūchheñ pūchhne vaale huā kyā

ye dekheñ us ne dil le kar kiyā kyā

duhā.ī hai shab-e-hijrāñ duhā.ī

qayāmat kī sahar kā aasrā kyā

kahāñ tak saath de zauq-e-nazāra

tire jalvoñ kā merā sāmnā kyā

rahī mashq-e-sitam dil par yuuñ hī gar

tumhārā hī miTegā ghar mirā kyā

yahī do-chār tinke āshiyāñ ke

milā sayyād ko is ke sivā kyā

batā do vāqi.āt-e-tūr kuchh to

kalīm-ullāh guzrā mājrā kyā

qafas jaane se pahle thā chaman meñ

nasheman bāġhbāñ merā huā kyā

unheñ dil de diyā nādīda 'afqar'

hijāb-o-ġhamza-o-nāz-o-adā kyā

diya jab dil to dilbar ka gila kya

sitam-parwar karam na-ashna kya

na puchhen puchhne wale hua kya

ye dekhen us ne dil le kar kiya kya

duhai hai shab-e-hijran duhai

qayamat ki sahar ka aasra kya

kahan tak sath de zauq-e-nazara

tere jalwon ka mera samna kya

rahi mashq-e-sitam dil par yun hi gar

tumhaara hi miTega ghar mera kya

yahi do-chaar tinke aashiyan ke

mila sayyaad ko is ke siwa kya

bata do waqiat-e-tur kuchh to

kalim-ullah guzra majra kya

qafas jaane se pahle tha chaman mein

nasheman baghban mera hua kya

unhen dil de diya nadida 'afqar'

hijab-o-ghamza-o-naz-o-ada kya