diyat is qatil-e-be-rahm se kya lijiyega

diyat is qātil-e-be-rahm se kyā lījiyegā

apnī hī āñkhoñ se ab ḳhuun bahā lījiyegā

phir nahīñ hone kī taqsīr to aisī hargiz

ab kisī tarah merī jaan bachā lījiyegā

is qadar sañg-dilī tum ko nahīñ hai lāzim

kisī mazlūm kī gaahe to duā lījiyegā

laḳht-e-dil ḳhaak meñ detā hai koī bhī rahne

gir paḌe ashk to āñkhoñ se uThā lījiyegā

phir na pachhtāo kahīñ baad mire jaane ke

gāliyāñ aur hoñ baaqī to sunā lījiyegā

ruuTh kar jaa.e koī apne se pyāre to vahīñ

chāhiye aap gale paḌ ke manā lījiyegā

apne mushtāq ko lāzim hai ki gaahe maahe

ġhair kī aañkh bachā ghar meñ bulā lījiyegā

ek muddat huī kuchh harf-o-hikāyat hī nahīñ

jī meñ hai aaj to bātoñ meñ lagā lījiyegā

kisī jalse meñ jo 'īmān' kaho to jāneñ

ghar meñ yuuñ baiThe hue sher banā lījiyegā

diyat is qatil-e-be-rahm se kya lijiyega

apni hi aankhon se ab KHun baha lijiyega

phir nahin hone ki taqsir to aisi hargiz

ab kisi tarah meri jaan bacha lijiyega

is qadar sang-dili tum ko nahin hai lazim

kisi mazlum ki gahe to dua lijiyega

laKHt-e-dil KHak mein deta hai koi bhi rahne

gir paDe ashk to aankhon se uTha lijiyega

phir na pachhtao kahin baad mere jaane ke

galiyan aur hon baqi to suna lijiyega

ruTh kar jae koi apne se pyare to wahin

chahiye aap gale paD ke mana lijiyega

apne mushtaq ko lazim hai ki gahe mahe

ghair ki aankh bacha ghar mein bula lijiyega

ek muddat hui kuchh harf-o-hikayat hi nahin

ji mein hai aaj to baaton mein laga lijiyega

kisi jalse mein jo 'iman' kaho to jaanen

ghar mein yun baiThe hue sher bana lijiyega