do-jahan se mawara ho jaega

do-jahāñ se māvarā ho jā.egā

jo tire ġham meñ fanā ho jā.egā

dard jab dil se judā ho jā.egā

sāz-e-hastī be-sadā ho jā.egā

dekhiye ahd-e-vafā achchhā nahīñ

marnā jiinā saath kā ho jā.egā

be-natīja hai ḳhayāl-e-tark-e-rāh

phir kisī din sāmnā ho jā.egā

ab Thahar jā yād-e-jānāñ ro to luuñ

farz-e-tanhā.ī adā ho jā.egā

lahza lahza rakh ḳhayāl-e-husn-e-dost

lamha lamha kaam kā ho jā.egā

zauq-e-azm-e-bā-amal darkār hai

aag meñ bhī rāsta ho jā.egā

apnī jānib jab nazar uTh jā.egī

zarra zarra ā.īna ho jā.egā

do-jahan se mawara ho jaega

jo tere gham mein fana ho jaega

dard jab dil se juda ho jaega

saz-e-hasti be-sada ho jaega

dekhiye ahd-e-wafa achchha nahin

marna jina sath ka ho jaega

be-natija hai KHayal-e-tark-e-rah

phir kisi din samna ho jaega

ab Thahar ja yaad-e-jaanan ro to lun

farz-e-tanhai ada ho jaega

lahza lahza rakh KHayal-e-husn-e-dost

lamha lamha kaam ka ho jaega

zauq-e-azm-e-ba-amal darkar hai

aag mein bhi rasta ho jaega

apni jaanib jab nazar uTh jaegi

zarra zarra aaina ho jaega