donon hi ki jaanib se ho gar ahd-e-wafa ho

donoñ hī kī jānib se ho gar ahd-e-vafā ho

chāhat kā mazā jab hai ki tum bhī mujhe chāho

ye ham nahīñ kahte haiñ ki dushman ko na chāho

is chaah kā anjām magar dekhiye kyā ho

shamshīr se baḌh kar haiñ hasīnoñ kī adā.eñ

be-maut kiyā qatl un achchhoñ kā burā ho

ma.ashūq tarah-dār ho andāz ho achchhā

dil aa.e na aise pe to phir dil kā burā ho

puurā koī hotā nazar aatā nahīñ armāñ

un ko to ye zid hai ki hamārā hī kahā ho

tum mujh ko pilāte to ho mai siina pe chaḌh kar

us vaqt agar koī chalā aa.e to kyā ho

va.ada vo tumhārā hai ki lab tak nahīñ aatā

matlab ye hamārā hai ki bātoñ meñ adā ho

ḳhanjar kī zarūrat hai na shamshīr kī hājat

tirchhī sī nazar ho koī bāñkī sī adā ho

ḳhālī to na jaa.eñ dam-e-ruḳhsat mire naale

fitna koī uTThe jo qayāmat na bapā ho

chorī kī to kuchh baat nahīñ mujh ko batā do

merā dil-e-betāb agar tum ne liyā ho

un se dam-e-raftār ye kahtī hai qayāmat

fitne se na ḳhālī koī naqsh-e-kaf-e-pā ho

bad-zan haiñ vo is tarah ki surma use samjheñ

bīmār kī āñkhoñ meñ agar niil Dhalā ho

ḳhat khol ke paḌhte hue Dartā huuñ kisī kā

lipTī huī ḳhat meñ na kahīñ merī qazā ho

marnā hai usī kā jo tujhe dekh ke mar jaa.e

jiinā hai usī kā jo mohabbat meñ jiyā ho

hai dil kī jagah siine meñ kāvish abhī baaqī

paikāñ koī pahlū meñ mire rah na gayā ho

mujh ko bhī kahīñ aur se aayā hai bulāvā

achchhā hai chalo aaj bhī va.ada na vafā ho

'beḳhud' kā fasāna to hai mash.hūr-e-zamāna

ye zikr to shāyad kabhī tum ne bhī sunā ho

donon hi ki jaanib se ho gar ahd-e-wafa ho

chahat ka maza jab hai ki tum bhi mujhe chaho

ye hum nahin kahte hain ki dushman ko na chaho

is chah ka anjam magar dekhiye kya ho

shamshir se baDh kar hain hasinon ki adaen

be-maut kiya qatl un achchhon ka bura ho

mashuq tarah-dar ho andaz ho achchha

dil aae na aise pe to phir dil ka bura ho

pura koi hota nazar aata nahin arman

un ko to ye zid hai ki hamara hi kaha ho

tum mujh ko pilate to ho mai sina pe chaDh kar

us waqt agar koi chala aae to kya ho

wada wo tumhaara hai ki lab tak nahin aata

matlab ye hamara hai ki baaton mein ada ho

KHanjar ki zarurat hai na shamshir ki hajat

tirchhi si nazar ho koi banki si ada ho

KHali to na jaen dam-e-ruKHsat mere nale

fitna koi uTThe jo qayamat na bapa ho

chori ki to kuchh baat nahin mujh ko bata do

mera dil-e-betab agar tum ne liya ho

un se dam-e-raftar ye kahti hai qayamat

fitne se na KHali koi naqsh-e-kaf-e-pa ho

bad-zan hain wo is tarah ki surma use samjhen

bimar ki aankhon mein agar nil Dhala ho

KHat khol ke paDhte hue Darta hun kisi ka

lipTi hui KHat mein na kahin meri qaza ho

marna hai usi ka jo tujhe dekh ke mar jae

jina hai usi ka jo mohabbat mein jiya ho

hai dil ki jagah sine mein kawish abhi baqi

paikan koi pahlu mein mere rah na gaya ho

mujh ko bhi kahin aur se aaya hai bulawa

achchha hai chalo aaj bhi wada na wafa ho

'beKHud' ka fasana to hai mashhur-e-zamana

ye zikr to shayad kabhi tum ne bhi suna ho