dost ko mahram bana kar dushman-e-jaan kar diya

dost ko mahram banā kar dushman-e-jāñ kar diyā

tū ne ai dil aap barbādī kā sāmāñ kar diyā

laġhzish-e-ādam to ham tak aa.ī hai mīrās meñ

the farishte lekin is ḳhūbī ne insāñ kar diyā

mehrbāñ ne ġham ġhalat karne kī rakkhī hai sabīl

jab paḌā hai qaht-e-mai to zahr arzāñ kar diyā

kaise kaise azm ho kar rah ga.e manzil kī nazr

kaisī kaisī ḳhvāhishoñ ko tum ne armāñ kar diyā

kab ḳhirad meñ zo.af aayā hai kabhī lekin use

vasvasoñ ne kund andeshoñ ne hairāñ kar diyā

ham ne bhī mahsūs kī ThanDak zarā sī chhāñv meñ

aaj 'shaukat' kis ne zulfoñ ko pareshāñ kar diyā

dost ko mahram bana kar dushman-e-jaan kar diya

tu ne ai dil aap barbaadi ka saman kar diya

laghzish-e-adam to hum tak aai hai miras mein

the farishte lekin is KHubi ne insan kar diya

mehrban ne gham ghalat karne ki rakkhi hai sabil

jab paDa hai qaht-e-mai to zahr arzan kar diya

kaise kaise azm ho kar rah gae manzil ki nazr

kaisi kaisi KHwahishon ko tum ne arman kar diya

kab KHirad mein zoaf aaya hai kabhi lekin use

waswason ne kund andeshon ne hairan kar diya

hum ne bhi mahsus ki ThanDak zara si chhanw mein

aaj 'shaukat' kis ne zulfon ko pareshan kar diya