dosti uski dushmani hi sahi

dostī us kī dushmanī hī sahī

dost to ho vo mudda.ī hī sahī

mastī-o-bahs-e-uzr-e-kaffāra

tauba se tauba ham ne kī hī sahī

hai agar kuchh vafā to kyā kahne

kuchh nahīñ hai to dil lagī hī sahī

jī hai ye bin lage nahīñ rahtā

kuchh to ho shaġhl-e-āshiqī hī sahī

mohtasib ḳhatm kījiye hujjat

pī hai to ḳhair ham ne pī hī sahī

haif ḳhamyāz-hā-e-hasrat-o-shauq

zindagānī kashākashī hī sahī

jaan de kar liyā hai nām-e-vafā

maut bhī ham ne mol lī hī sahī

milte haiñ mudda.ī se milne do

ki mirī nā-ḳhushī ḳhushī hī sahī

bosa dene kī chiiz hai āḳhir

na sahī har ghaḌī kabhī hī sahī

qatl hote haiñ qatl hote haiñ

ahd-e-dil daur-e-nādarī hī sahī

ai 'qalaq' nāsehoñ se kyā takrār

maan ik baat maan lī hī sahī

dosti us ki dushmani hi sahi

dost to ho wo muddai hi sahi

masti-o-bahs-e-uzr-e-kaffara

tauba se tauba hum ne ki hi sahi

hai agar kuchh wafa to kya kahne

kuchh nahin hai to dil lagi hi sahi

ji hai ye bin lage nahin rahta

kuchh to ho shaghl-e-ashiqi hi sahi

mohtasib KHatm kijiye hujjat

pi hai to KHair hum ne pi hi sahi

haif KHamyaz-ha-e-hasrat-o-shauq

zindagani kashakashi hi sahi

jaan de kar liya hai nam-e-wafa

maut bhi hum ne mol li hi sahi

milte hain muddai se milne do

ki meri na-KHushi KHushi hi sahi

bosa dene ki chiz hai aaKHir

na sahi har ghaDi kabhi hi sahi

qatl hote hain qatl hote hain

ahd-e-dil daur-e-nadari hi sahi

ai 'qalaq' nasehon se kya takrar

man ek baat man li hi sahi