dua karo ki koi pyas nazr-e-jam na ho

duā karo ki koī pyaas nazr-e-jām na ho

vo zindagī hī nahīñ hai jo nā-tamām na ho

jo mujh meñ tujh meñ chalā aa rahā hai sadiyoñ se

kahīñ hayāt usī fāsle kā naam na ho

koī charāġh na aañsū na ārzū-e-sahar

ḳhudā kare ki kisī ghar meñ aisī shaam na ho

ajiib shart lagā.ī hai ehtiyātoñ ne

ki terā zikr karūñ aur terā naam na ho

sabā-mizāj kī tezī bhī ek ne.amat hai

agar charāġh bujhānā hī ek kaam na ho

'vasīm' kitnī hī sub.heñ lahū lahū guzrīñ

ik aisī sub.h bhī aa.e ki jis kī shaam na ho

dua karo ki koi pyas nazr-e-jam na ho

wo zindagi hi nahin hai jo na-tamam na ho

jo mujh mein tujh mein chala aa raha hai sadiyon se

kahin hayat usi fasle ka nam na ho

koi charagh na aansu na aarzu-e-sahar

KHuda kare ki kisi ghar mein aisi sham na ho

ajib shart lagai hai ehtiyaton ne

ki tera zikr karun aur tera nam na ho

saba-mizaj ki tezi bhi ek neamat hai

agar charagh bujhana hi ek kaam na ho

'wasim' kitni hi subhen lahu lahu guzrin

ek aisi subh bhi aae ki jis ki sham na ho