Dubo ke mulk se tere hisab ka suraj

Dubo ke mulk se tere hisāb kā sūraj

nikālnā hai hameñ inqalāb kā sūraj

kisī bhī shaḳhs ko laate nahīñ vo nazroñ meñ

bulandiyoñ pe abhī hai janāb kā sūraj

miTā ke zulm kī rakh degā ye tamāzat ko

nikal rahā hai na.ī āb-o-tāb kā sūraj

hai nuur chhāyā huā har taraf zamāne meñ

chamak rahā hai kisī ke shabāb kā sūraj

agar ġharīb kā bebas kā dil dukhā.egā

jalā ke chhoḌegā tujh ko azaab kā sūraj

jabīñ pe aap kī sajdoñ ke gar nishāñ hoñge

lahad ko rakkhegā raushan savāb kā sūraj

ḳhudā kī zaat se ummīd hai ye 'shād' hameñ

ugegā ek din apne hisāb kā sūraj

Dubo ke mulk se tere hisab ka suraj

nikalna hai hamein inqalab ka suraj

kisi bhi shaKHs ko late nahin wo nazron mein

bulandiyon pe abhi hai janab ka suraj

miTa ke zulm ki rakh dega ye tamazat ko

nikal raha hai nai aab-o-tab ka suraj

hai nur chhaya hua har taraf zamane mein

chamak raha hai kisi ke shabab ka suraj

agar gharib ka bebas ka dil dukhaega

jala ke chhoDega tujh ko azab ka suraj

jabin pe aap ki sajdon ke gar nishan honge

lahad ko rakkhega raushan sawab ka suraj

KHuda ki zat se ummid hai ye 'shad' hamein

ugega ek din apne hisab ka suraj