dukh nawishta hai to aandhi ko likha aahista

dukh navishta hai to āñdhī ko likhā āhista

ai ḳhudā ab ke chale zard havā āhista āhista

ḳhvāb jal jaa.eñ mirī chashm-e-tamannā bujh jaa.e

bas hathelī se uḌe rañg-e-hinā āhista

zaḳhm hī kholne aa.ī hai to ujlat kaisī

chhū mire jism ko ai bād-e-sabā āhista

TūTne aur bikharne kā koī mausam ho

phuul kī ek duā mauj-e-havā āhista

jāntī huuñ ki bichhaḌnā tirī majbūrī hai

par mirī jaan mile mujh ko sazā āhista

mirī chāhat meñ bhī ab soch kā rañg aane lagā

aur tirā pyaar bhī shiddat meñ huā āhista

niiñd par jaal se paḌne lage āvāzoñ ke

aur phir hone lagī terī sadā āhista

raat jab phuul ke ruḳhsār pe dhīre se jhukī

chāñd ne jhuk ke kahā aur zarā āhista

dukh nawishta hai to aandhi ko likha aahista

ai KHuda ab ke chale zard hawa aahista aahista

KHwab jal jaen meri chashm-e-tamanna bujh jae

bas hatheli se uDe rang-e-hina aahista

zaKHm hi kholne aai hai to ujlat kaisi

chhu mere jism ko ai baad-e-saba aahista

TuTne aur bikharne ka koi mausam ho

phul ki ek dua mauj-e-hawa aahista

jaanti hun ki bichhaDna teri majburi hai

par meri jaan mile mujh ko saza aahista

meri chahat mein bhi ab soch ka rang aane laga

aur tera pyar bhi shiddat mein hua aahista

nind par jal se paDne lage aawazon ke

aur phir hone lagi teri sada aahista

raat jab phul ke ruKHsar pe dhire se jhuki

chand ne jhuk ke kaha aur zara aahista