dukhe hue hain hamein aur ab dukhao mat

dukhe hue haiñ hameñ aur ab dukhāo mat

jo ho ga.e ho fasāna to yaad aao mat

ḳhayāl-o-ḳhvāb meñ parchhā.iyāñ sī nāchtī haiñ

ab is tarah to mirī ruuh meñ samāo mat

zamīñ ke log to kyā do diloñ kī chāhat meñ

ḳhudā bhī ho to use darmiyān laao mat

tumhārā sar nahīñ tiflān-e-rah-guzar ke liye

dayār-e-sañg meñ ghar se nikal ke jaao mat

sivā.e apne kisī ke bhī ho nahīñ sakte

ham aur log haiñ logo hameñ satāo mat

hamāre ahd meñ ye rasm-e-āshiqī Thahrī

faqīr ban ke raho aur sadā lagāo mat

vahī likho jo lahū kī zabāñ se miltā hai

suḳhan ko parda-e-alfāz meñ chhupāo mat

supurd kar hī diyā ātish-e-hunar ke to phir

tamām ḳhaak hī ho jaao kuchh bachāo mat

dukhe hue hain hamein aur ab dukhao mat

jo ho gae ho fasana to yaad aao mat

KHayal-o-KHwab mein parchhaiyan si nachti hain

ab is tarah to meri ruh mein samao mat

zamin ke log to kya do dilon ki chahat mein

KHuda bhi ho to use darmiyan lao mat

tumhaara sar nahin tiflan-e-rah-guzar ke liye

dayar-e-sang mein ghar se nikal ke jao mat

siwae apne kisi ke bhi ho nahin sakte

hum aur log hain logo hamein satao mat

hamare ahd mein ye rasm-e-ashiqi Thahri

faqir ban ke raho aur sada lagao mat

wahi likho jo lahu ki zaban se milta hai

suKHan ko parda-e-alfaz mein chhupao mat

supurd kar hi diya aatish-e-hunar ke to phir

tamam KHak hi ho jao kuchh bachao mat