dukhi dilon ke liye taziyana rakhta hai

dukhī diloñ ke liye tāziyāna rakhtā hai

har ek shaḳhs yahāñ ik fasāna rakhtā hai

kisī bhī haal meñ raazī nahīñ hai dil ham se

har ik tarah kā ye kāfir bahāna rakhtā hai

azal se Dhañg haiñ dil ke ajiib se shāyad

kisī se rasm-o-rah ġhā.ebāna rakhtā hai

koī to faiz hai koī to baat hai is meñ

kisī ko dost yūñhī kab zamāna rakhtā hai

faqīh-e-shahr kī bātoñ se dar-guzar behtar

bashar hai aur ġham-e-āb-o-dāna rakhtā hai

muāmlāt-e-jahāñ kī ḳhabar hī kyā us ko

muāmlā hī kisī se rakkhā na rakhtā hai

hamīñ ne aaj tak apnī taraf nahīñ dekhā

tavaqquāt bahut kuchh zamāna rakhtā hai

qalandarī hai ki rakhtā hai dil ġhanī 'anjum'

koī dukāñ na koī kār-ḳhāna rakhtā hai

dukhi dilon ke liye taziyana rakhta hai

har ek shaKHs yahan ek fasana rakhta hai

kisi bhi haal mein raazi nahin hai dil hum se

har ek tarah ka ye kafir bahana rakhta hai

azal se Dhang hain dil ke ajib se shayad

kisi se rasm-o-rah ghaebana rakhta hai

koi to faiz hai koi to baat hai is mein

kisi ko dost yunhi kab zamana rakhta hai

faqih-e-shahr ki baaton se dar-guzar behtar

bashar hai aur gham-e-ab-o-dana rakhta hai

muamlat-e-jahan ki KHabar hi kya us ko

muamla hi kisi se rakkha na rakhta hai

hamin ne aaj tak apni taraf nahin dekha

tawaqquat bahut kuchh zamana rakhta hai

qalandari hai ki rakhta hai dil ghani 'anjum'

koi dukan na koi kar-KHana rakhta hai