duniya bhi ajab qafila-e-tishna-laban hai

duniyā bhī 'ajab qāfila-e-tishna-labāñ hai

har shaḳhs sarāboñ ke ta'āqub meñ ravāñ hai

tanhā tirī mahfil meñ nahīñ huuñ ki mire saath

ik lazzat-e-pābandī-e-iz.hār-o-bayāñ hai

haq baat pe hai zahr bhare jaam kī ta.azīr

ai ġhairat-e-īmāñ lab-e-suqrāt kahāñ hai

khetoñ meñ samātī nahīñ phūlī huī sarsoñ

bāġhoñ meñ abhī tak vahī hañgām-e-ḳhizāñ hai

ehsās mirā hijr-gazīda hai azal se

kyā mujh ko agar koī qarīb-e-rag-e-jāñ hai

jo dil ke samundar se ubhartā hai yaqīñ hai

jo zehn ke sāhil se guzartā hai gumāñ hai

phūloñ pe ghaTāoñ ke to saa.e nahīñ 'anvar'

āvāra-e-gulzār nasheman kā dhuāñ hai

duniya bhi 'ajab qafila-e-tishna-laban hai

har shaKHs sarabon ke ta'aqub mein rawan hai

tanha teri mahfil mein nahin hun ki mere sath

ek lazzat-e-pabandi-e-izhaar-o-bayan hai

haq baat pe hai zahr bhare jam ki tazir

ai ghairat-e-iman lab-e-suqraat kahan hai

kheton mein samati nahin phuli hui sarson

baghon mein abhi tak wahi hangam-e-KHizan hai

ehsas mera hijr-gazida hai azal se

kya mujh ko agar koi qarib-e-rag-e-jaan hai

jo dil ke samundar se ubharta hai yaqin hai

jo zehn ke sahil se guzarta hai guman hai

phulon pe ghaTaon ke to sae nahin 'anwar'

aawara-e-gulzar nasheman ka dhuan hai