duniya dekhi zamana dekha

duniyā dekhī zamāna dekhā

tujh ko sab meñ yagāna dekhā

mai bhī pī mai-ḳhāna dekhā

rabt-e-ḳhum-o-paimāna dekhā

sab kuchh dekhā aañkh se apnī

tujh ko agar jānāna dekhā

dekhā terā jalva mahvash

nāz-e-ma.ashūqāna dekhā

kaisī kaisī sūrateñ dekhīñ

dil ko ā.ina-ḳhāna dekhā

gardish-e-chashm-e-sitamgar dekhī

palTā khāte zamāna dekhā

sāthī ham ne tujh ko paayā

sab matlab kā zamāna dekhā

ham ne chashm-e-mast kā terī

ik aalam mastāna dekhā

dil kī jalan se aag meñ kuudā

kyoñ soz-e-parvāna dekhā

kyā kyā ishq meñ saḳhtī jhelī

'akbar' ko mardāna dekhā

duniya dekhi zamana dekha

tujh ko sab mein yagana dekha

mai bhi pi mai-KHana dekha

rabt-e-KHum-o-paimana dekha

sab kuchh dekha aankh se apni

tujh ko agar jaanana dekha

dekha tera jalwa mahwash

naz-e-mashuqana dekha

kaisi kaisi suraten dekhin

dil ko aaina-KHana dekha

gardish-e-chashm-e-sitamgar dekhi

palTa khate zamana dekha

sathi hum ne tujh ko paya

sab matlab ka zamana dekha

hum ne chashm-e-mast ka teri

ek aalam mastana dekha

dil ki jalan se aag mein kuda

kyon soz-e-parwana dekha

kya kya ishq mein saKHti jheli

'akbar' ko mardana dekha